XULIO BERROS

«La lliteratura pa neños tien salú»
«Col pasu del tiempu, tenemos un bon piñu d’obres que faen que la nuesa lliteratura n’asturianu pa xente mozo seya de calidá»

ENRIQUE CARBALLEIRA

L’escritor Xulio Berros (Sotrondio, 1963) ye un de los autores más destacaos del panorama de la lliteratura infantil y xuvenil n’asturianu.
Tien espublizaos siete llibros, ente ellos tres dedicaos a ún de los sos personaxes más populares: la neña Toya. Precisamente con esti personaxe acaba presentar un nuevu volume, editáu pola Academia de la Llingua, ‘Toya yá ye grande’, nel que la protagonista esperimenta una importante evolución.


–¿Qué novedaes atopamos nesti nuevu llibru de Toya?

–Dalgunes; Toya va medrando y poro enfréntase a problemes nuevos: un cursu nuevu y una maestra nueva, la muerte de d’una persona del so mundu, nuevos collacios, nueves actividaes nes que participa, la música qu’escucha ya comparte colos collacios… Ah y tamién como novedá mui prestosa apaez un nuevu ilustrador de Toya.


–Vemos qu’estos temes, como la muerte del güelu, que ye un de los asuntos sobre los que xira l’argumentu, tan resueltos d’una forma mui cercana y que pue ser entendía polos llectores mozos...

–Efeutivamente, los neños y les neñes nun son ayenos a esti tema, y al mio entender tienen unes formes mui curioses de sentir la perda d’un ser mui queríu. Nel llibru trato de reflexar una d’elles, anque trátase namás d’un exemplu, hai otres bien estremaes, porque los neños de la edá de Toya comparten, eso pienso, una exa común metanes el mieu y un fondu sentimientu de cariñu col qu’encaren la muerte.


–Toya nació nel añu 1998, al menos editorialmente. ¿Cómo surdió la idea del so nacimientu?

–Toya afítase nun personaxe real que vive en mio casa, ye dicir na mio fía, y surdió por una necesidá personal de cuntar como ye’l mundu de los neños y la so vida nos escenarios nos que se desendolca: en casa y na escuela. Amás nos dos caberos llibros de Toya hai dos poemes escritos por Andrea Berros, la mio neña, que dan más realismu a la historia pues fueron fechos por ella cuando tenía más o menos la edá de Toya.


–Van tres llibros espublizaos con esti personaxe, ¿va siguir creciendo, evolucionando?

–Espero que sí, recién ‘la otra Toya’ sofitó que polo menos tiende llegar al Institutu, asina que nun la podemos defraudar, amás dalgunos pequeños asuntos perfilaos nesti caberu llibru tienen que resolvese, por exemplu hai que ver hasta onde pue llegar la pequeña Toya nel duru mundu del baloncestu escolar.


–Usté amosaba nel entamu del so camín lliterariu en 1994, que’l principal oxetivu yera que los llectores pudieran pasar unos momentos bonos. ¿Sigue valiendo esti principiu?

–Sí, caltengo esi oxetivu porque camiento que pa los llectores más mozos la llectura tien que ser un momentu prestosu, si amás alcuentren que comparten coses colos personaxes de les obres que lleen, la llectura resulta una xera mui guapa.


–Ta especializáu en lliteratura infantil y xuvenil, ¿nun lu tenten otros xéneros?

–Non, lo que más me presta ye lleer lliteratura pa neños y escribir pa ellos.


–Tien una bona páxina web na que los llectores puen atopar munchos datos sobre usté. Paez qu’esti nuevu mediu de comunicación ta teniendo efeutos mui bonos pa esparder la lliteratura y l’enfotu pola llectura...

–Toi totalmente d’alcuerdu. Lliteratura y nueves teunoloxíes de la comunicación tienen que dir de la mano, na mio web (de fabricación casera y poro con milenta fallucos) trato d’enseñar lo qu’escribo, asina colgué los entamos de tolos llibros que tengo espublizaos col enfotu de que cualquier persona que pase per ellí puea tener una idea exauta de lo que pue atopar nun llibru de los de mio. Amás cunto otres coses que faigo, rellacionaes colos neños, la enseñanza y les nueves teunoloxíes.


–¿Cómo ve’l paisaxe lliterariu n’asturies? ¿Y lo que se fai pa los llectores más mozos?

–Yo falo de lo que conozo, ye dicir de la Lliteratura Infantil y Xuvenil, y col pasu del tiempu yá tenemos un piñu d’obres que faen que la nuesa lliteratura pa xente mozo seya de bona calidá.
Hai coleiciones pa neños bien afitaes y con numberoses obres mui granibles. Prestaríame citar una riestra d’autores imprescindibles pa cualquier llector mozu d’Asturies: V. García Oliva, P. Rodríguez Medina, M. Rojo, I. Díaz Trancho...
Como ves dellos nomes, asina que la salú de la lliteratura pa neños ye bien bona.


–¿Qué será lo próximu que veremos de Xulio Berros?

–Hai un par d’idegues esnalando perehí, una con nueves hestories de Toya y otra que nun tien que ver col personaxe que me tien entreteníu dende unos años.